mujhe mujh se milātī jā rahī hai
faqīrī raas aatī jā rahī hai
ye miTTī mere ḳhāl-o-ḳhad churā kar
tirā chehra banātī jā rahī hai
ye kis kī yaad hai jo mere dil meñ
musalle se bichhātī jā rahī hai
ajab shai hai suḳhan kī sar-bulandī
mire sar ko jhukātī jā rahī hai
jo mastī raqs meñ rakhtī thī mujh ko
vo sajdoñ meñ rulātī jā rahī hai
lahū bahne lagā hai eḌiyoñ tak
ibādat rañg laatī jā rahī hai