Faisal Ajmi

gir jae jo diwar to matam nahin karte

Faisal Ajmi

1951

gir jaa.e jo dīvār to mātam nahīñ karte

karte haiñ bahut log magar ham nahīñ karte

hai apnī tabī.at meñ jo ḳhāmī to yahī hai

ham ishq to karte haiñ magar kam nahīñ karte

nafrat se to behtar hai ki raste judā hoñ

bekār guzargāhoñ ko bāham nahīñ karte

har saañs meñ dozaḳh tapish hai magar ham

sūraj tarah aag ko maddham nahīñ karte

kyā ilm ki rote hoñ to mar jaate hoñ 'faisal'

vo log jo āñkhoñ ko kabhī nam nahīñ karte

Top Urdushayar.com