nākām merī koshish-e-zabt-e-alam nahīñ

yuuñ mutma.in huuñ jaise mujhe koī ġham nahīñ

tārīkiyoñ meñ aaj bhī gum hai vo rahguzar

jis ko nasīb aap ke naqsh-e-qadam nahīñ

is daur meñ ki jis meñ hai jins-e-vafā kā qaht

ham se vafā-shi.ār jo baaqī haiñ kam nahīñ

tere sivā kisī se ujāloñ kī bhiik le

kam-zarf is qadar to mirī shām-e-ġham nahīñ

bikhre hue se 'rāhī' ye aurāq-e-zindagī

apnī hayāt zulf-e-pareshāñ se kam nahīñ