kuchh taġhāful hai to kuchh nāz-o-adā-kārī hai

qahr kā qahr hai dildārī kī dildārī hai

iltifāt-e-nigah-e-nāz se bach kar rahnā

jazba-e-ishq tire qatl kī tayyārī hai

shafqateñ zinda haiñ iḳhlās kī buniyādoñ par

ab bhī kuchh logoñ meñ pahle sī ravādārī hai

yahī tahzīb to virse meñ milī hai mujh ko

tum anā samjhe ho jis ko mirī ḳhuddārī hai

silsila ḳhatm hijābāt kā hotā hī nahīñ

aa.ina dekhne vaale ko bhī dushvārī hai

aaj kī raat hai tūfān ke aane kī ḳhabar

aaj kī raat charāġhoñ pe bahut bhārī hai

log ḳhush-fahm haiñ yā ḳhvāb-gazīda 'ālam'

jāgte rahne ko samjhe haiñ ki bedārī hai