numūd paate haiñ manzaroñ kī shikast se fat.h ke bahāne
charāġh zinda kiyā hai merā galī meñ dam toḌtī havā ne
ye jānte haiñ ki sāmne hai gurez kartī huī mohabbat
magar mire saath chal rahe haiñ vahī mazāhir vahī zamāne
musāfiroñ ke liye to yaksāñ hai dasht aur shahr se guzarnā
ki shaam hote hī taan lete haiñ log ḳhvāboñ ke shāmiyāne
to kyuuñ ye sāhil kī dhuup mere niDhāl qadmoñ se aa lagī hai
mujhe kināre lagā diyā hai agar kisī shaḳhs kī duā ne
kisī ko ik ātish-e-gumāñ ne tamām-tar raakh kar diyā hai
kisī ko kandan banā diyā hai yaqīn kī ḳhāk-e-kīmiyā ne
har aan mere vajūd meñ yuuñ anā kī ta.amīr ho rahī hai
ki jaise bhejā gayā huuñ maiñ bhī zamīn par ik makāñ banāne
mujhe yaqīñ hai ki mere bas meñ hai manzil-e-shauq par utarnā
mujhe bahut hausla diyā hai mirī mohabbat mire ḳhudā ne