jab koī phuul musaḳhḳhar na ho āsānī se
kaam letā huuñ vahāñ naqd-e-sanā-ḳhvānī se
raushnī dene lage the mirī āñkhoñ ke charāġh
raat taktā thā samundar mujhe hairānī se
kar ke dekhūñgā kisī tarah lahū kī bārish
ātish-e-hijr bujhegī na agar paanī se
un ko paane kī tamannā nahīñ jaatī dil se
kyā munavvar haiñ sitāre mirī tābānī se
koī masrūf hai taz.īn meñ qasr-e-dil kī
chob-kārī se kahīñ ā.ina-sāmānī se
ḳhāk-zādoñ se ta.alluq nahīñ rakhte kuchh log
mezbānī se ġharaz un ko na mehmānī se
maiñ isī ḳhaak pe baiThā huuñ baḌe shauq ke saath
koī nisbat nahīñ ab tak mujhe sultānī se
band ho jaa.e agar rauzan-e-imkān-e-ḳhayāl
ḳhvāb khulte haiñ mire dil meñ farāvānī se
merī sūrat se jo bezār haiñ ab bhī 'sājid'
kab vo ḳhush hoñge mire tarz-e-musalmānī se