aaj ā.īñe meñ jo kuchh bhī nazar aatā hai
us ke hone pe yaqīñ bār-e-digar aatā hai
zehn o dil kartā huuñ jab rañj-e-jahāñ se ḳhālī
koī be-tarah mirī ruuh meñ dar aatā hai
guftugū karte hue jaate haiñ phūloñ ke giroh
aur chupke se daraḳhtoñ pe samar aatā hai
bach nikalne pe mire ḳhush nahīñ vo jān-e-bahār
koī ilzām mukarrar mire sar aatā hai
lauT jaane kī ijāzat nahīñ dūñgā us ko
koī ab mere ta.āqub meñ agar aatā hai
merī āñhkeñ bhī mayassar nahīñ ātīñ mujh ko
jab mulāqāt ko vo ḳhvāb-e-sahar aatā hai
merī qismat hai ye āvāra-ḳhirāmī 'sājid'
dasht ko raah nikaltī hai na ghar aatā hai