husn kī har adā pe martā huuñ

zindagī terī qadr kartā huuñ

kho na jaa.eñ maze huzūrī ke

saañs lete hue bhī Dartā huuñ

ishq kī hai ye kaun sī manzil

gaah jiitā huuñ gaah martā huuñ

kaun aarif hai azmat-e-ġham kā

miT ke maiñ aur bhī nikhartā huuñ

ho ke pāmāl rāh-e-ulfat meñ

kyā bigaḌtā huuñ kyā sañvartā huuñ

bahr-e-ġham meñ ye fikr kis ko hai

ġharq hotā huuñ yā ubhartā huuñ

ġhair ko rāz-dār kyā kartā

maiñ 'bashīr' aap se bhī Dartā huuñ