fasl-e-gul kuchh bhī nahīñ bād-e-sabā kuchh bhī nahīñ

terī mahfil ho to jannat kī fazā kuchh bhī nahīñ

jān-o-dil kar diye ham ne tirī rāhoñ meñ nisār

aur hamāre liye tohmat ke sivā kuchh bhī nahīñ

pakḌe jā.eñge hamīñ hashr meñ be-jurm-o-qusūr

aur gunāhgār ko duniyā meñ sazā kuchh bhī nahīñ

un ke dil par mirā ehsās-e-sitam bhī hai garāñ

ġhair kī sho.ala-bayānī kā gilā kuchh bhī nahīñ

jām-e-jam ho kahīñ gardish meñ magar phir bhī 'hayāt'

chashm-e-sāqī se na chhilke to mazā kuchh bhī nahīñ