itnā mohtāt ki jumbish nahīñ karne degā

umr-bhar ek guzārish nahīñ karne degā

us se ummīd ye karte ho ki sūraj kā tavāf

vo to mehvar pe bhī gardish nahīñ karne degā

dil hī chāhegā to zanjīr ke TukḌe hoñge

us se pahle koī koshish nahīñ karne degā

paar karne ke liye aaj bhī dariyā kā bahāo

aisā rakkhegā ki ḳhvāhish nahīñ karne degā

ab bhī siine meñ kahāñ baaġh utarne vaalā

paañv de jā.egā laġhzish nahīñ karne degā