shab Dhalī mahfil uThī ab ghar chaleñ
har taraf hai ḳhāmushī ab ghar chaleñ
DhūñDte ho kyā ḳhushī ab ghar chaleñ
mil chuke haiñ ġham ka.ī ab ghar chaleñ
dekh kar sahrā meñ ḳhvāb-e-gulsitāñ
thak chukī hai rah-ravī ab ghar chaleñ
jal uThā dil meñ charāġh-e-āgahī
raah kuchh raushan huī ab ghar chaleñ
nāḳhudā laayā ki laayā hai ḳhudā
naav sāhil par lagī ab ghar chaleñ
koī to 'bebāk' hogī muntazir
maut ho yā zindagī ab ghar chaleñ