sadme yuuñ ġhair par nahīñ aate

tumheñ jaur is qadar nahīñ aate

phir tasallī kī kaun sī sūrat

ḳhvāb meñ bhī nazar nahīñ aate

aate haiñ jab ki nā-umīd hoñ ham

kabhī vo va.ade par nahīñ aate

roz ke intizār ne maarā

saaf kah do agar nahīñ aate

nahīñ ma.alūm is kā kyā baa.is

roz kahte haiñ par nahīñ aate

aur tum kis ke ghar nahīñ jaate

ek mere hī ghar nahīñ aate

ab to hai qahr aap kā jaanā

nahīñ aate agar nahīñ aate

sach hai hiile mujhī ko aate haiñ

aur tumheñ kis qadar nahīñ aate

un ko maiñ is tarah bhulā.ūñ 'nizām'

yaad kis baat par nahīñ aate