har ghaḌī rahtā hai ab ḳhadshā mujhe
pī na jaa.e vaqt kā dariyā mujhe
go haqīqat thā magar ai zindagī
ḳhvāb sā tū ne sadā dekhā mujhe
jab bhī miltā huuñ vahī chehra liye
bad-duā detā hai ā.īnā mujhe
chhoḌ aayā huuñ sulagtī ret meñ
jaane kyā kahtā ho naqsh-e-pā mujhe
us ke dil meñ ḳhud vafā nā-paid thī
dostī kī bhiik kyā detā mujhe
Dūbtī bujhtī huī āvāz huuñ
saath vaalo ġhaur se sunñā mujhe