shahr shahr DhūñD aa.e dar-ba-dar pukār aa.e
sīna-chāk nikle the aur dil-figār aa.e
ham ki the tahī-dāman dost aur kyā karte
zindagī sī dilkash shai tere ġham meñ haar aa.e
tere dar se ġham le kar jab gunāhgār uThe
mai-kadoñ kā kyā kahnā masjideñ sañvār aa.e
laġhzishoñ se vābasta laġhzisheñ qayāmat kī
raat kuchh ajab dhun meñ tere bāda-ḳhvār aa.e
dosto bas is lamha ham ko yaad kar lenā
jab kabhī gulistāñ meñ mausam-e-bahār aa.e