shab bhalī thī na din burā thā koī
jaisā jī ko tire lagā thā koī
ashk the kirchiyāñ thiiñ āñkheñ thiiñ
aa.ine se umañD paḌā thā koī
TuuT kar kis ne kis ko chāhā thā
kis kā malba uThā rahā thā koī
laakh āñchal havā ke haath meñ the
sar-barahna magar khaḌā thā koī
apne hī sar meñ Dālne ke liye
ḳhaak apnī uḌā rahā thā koī
apnī marzī se kaun qatl huā
apnī marzī se kab jiyā thā koī
hashr barpā thā mere dil meñ 'najīb'
khiḌkiyāñ kholne lagā thā koī