sab ko batā rahā huuñ yahī saaf saaf maiñ

jalte diye se kaise karūñ inhirāf meñ

maiñ ne to āsmān ke rañgoñ kī baat kī

kahne lagī zamīn badal duuñ ġhilāf meñ

gumrāh kab kiyā hai kisī raah ne mujhe

chalne lagā huuñ aap hī apne ḳhilāf meñ

miltā nahīñ hai phir bhī sirā āsmān kā

kar kar ke thak chukā huuñ zamīñ kā tavāf meñ

ab tū bhī aa.ine kī tarah bolne lagā

patthar se bhar na duuñ tire muñh kā shigāf meñ