añdherī khaa.ī se goyā safar chaTān kā thā
jo fāsla mire ghar se tire makān kā thā
bichhaḌ ke tujh se vo aalam mirī uḌaan kā thā
ki maiñ zamīñ kā rahā thā na āsmān kā thā
tamām umr mire dil meñ jo khaTaktā rahā
vo tiir tere kisī tanz kī kamān kā thā
yaqīñ ke Thos dalā.el jise na kaaT sake
tirī vafā se vo rishta mire gumān kā thā
tum apne azm ke shal bāzuoñ ko mat chūmo
manāo ḳhair ki ehsān bādbān kā thā