tamāshe chuTkule taalī meñ mat rakh
adab ko aisī bad-halī meñ mat rakh
ki zahr ho jā.eñge pakvān saare
unheñ ehsās kī thālī meñ mat rakh
ḳhayāloñ kā parinda kah rahā hai
mujhe ākāsh de jaalī meñ mat rakh
udāsī ḳhuun meñ ghul jā.egī phir
use tū chaa.e kī pyālī meñ mat rakh
baḌak-pan peḌ sikhlāte haiñ ham ko
pake phal ko kabhī Daalī meñ mat rakh
kamāne meñ bahut kuchh kho gayā hai
kisī ko aisī kañgālī meñ mat rakh