aa.ī thī us taraf jo havā kaun le gayā

ḳhālī paḌā hai taaq diyā kaun le gayā

is shahr meñ to koī sulaimān bhī nahīñ

maiñ kyā batā.ūñ taḳht-e-sabā kaun le gayā

dushman aqab meñ aa bhī gayā aur abhī talak

tum ko ḳhabar nahīñ hai asā kaun le gayā

apne badan se lipTā huā aadmī thā maiñ

mujh se chhuḌā ke mujh ko batā kaun le gayā

'gauhar' ye mājrā to parindoñ se pūchhnā

peḌoñ ko kyā pata hai havā kaun le gayā