koī khiḌkī jo khulī rahtī hai

sāmne shakl vahī rahtī hai

mere hoñToñ pe hañsī rahtī hai

aag phūloñ meñ dabī rahtī hai

jaise har chiiz pighal jā.egī

dhuup yuuñ sar pe khaḌī rahtī hai

ab to ḳhvāboñ ke bhī ā.īne meñ

vaqt kī dhuul jamī rahtī hai

merī tanhā.ī ke darvāze par

jaane kyuuñ bhiiḌ lagī rahtī hai

kitnī qātil hai ye duniyā lekin

kitnī ma.asūm banī rahtī hai

tez-rau vaqt se aage 'sāqib'

merī shorīda-sarī rahtī hai