bañdhā hai ahd-e-junūñ chashm-e-etibār ke saath

use kaho ki jiye azm-e-ustuvār ke saath

na ho sakī kabhī taufīq darguzar kī use

na chal sake kabhī ham ḳhud bhī eqtidār ke saath

faqīh-e-shahr se kahnā ki dil kushāda rakhe

milā hai mansab-e-a.alā jo iḳhtiyār ke saath

nishān-e-nāqa-e-lailā pahuñch se duur nahīñ

kabhī chalo to sahī do qadam ġhubār ke saath

tamām-umr rahā vo rahīn-e-minnat-e-ġhair

use to marnā bhī aayā nahīñ vaqār ke saath

azal se 'arsh' ik āvārgī nasīb meñ hai

havā-e-dasht ko nisbat nahīñ qarār ke saath