hai koī dard musalsal ravāñ-davāñ mujh meñ

banā liyā hai udāsī ne ik makāñ mujh meñ

milā hai izn-e-suḳhan kī masāfatoñ kā phir

khule hue haiñ taḳhayyul ke bādbāñ mujh meñ

sahābī shaam sar-e-chashm phailte jugnū

kisī ḳhayāl ne bo dī ye kahkashāñ mujh meñ

muhājrat ye shajar-dar-shajar havāoñ kī

basā.e jaatī hai ḳhāna-badoshiyāñ mujh meñ

ajiib zid pe ba-zid hai ye musht-e-ḳhāk-badan

agar hai merī rahe phir ye merī jaañ mujh meñ

mirā vajūd banā hai ye kaisī miTTī se

samā.e jaatī haiñ kitnī hī hastiyāñ mujh meñ