raat kī saarī haqīqat din meñ uryāñ ho ga.ī
ḳhvāb kī ta.abīr paḌh kar aañkh hairāñ ho ga.ī
har nafs sail-e-havādis har qadam amvāj-e-ġham
zindagī is daur meñ tūfāñ hī tūfāñ ho ga.ī
ārzū-dar-ārzū baḌhtī ga.iiñ mahrūmiyāñ
har tamannā rafta rafta dushman-e-jāñ ho ga.ī
kitnī be-ma.anī rifāqat abr ke TukḌoñ meñ thī
dekh kar mere gharauñde barq-o-bārāñ ho ga.ī
vo tire bachpan kī chiñgārī bhī thī mausam-shanās
jab javāñ hone ke din aa.e farozāñ ho ga.ī
soz-e-dil dard-e-jigar ḳhūn-e-tamannā ashk-e-ġham
ek laġhzish kitne afsānoñ kā unvāñ ho ga.ī