baat ke saath hī maujūd hai Taal ek na ek

hai ḳhilāf apne sadā aap ke chaal ek na ek

ham bhī is vāste baiThe haiñ ki ho rahtā hai

tujh sahī sarv ke saaye meñ nihāl ek na ek

yaar hai paas par ab fart-e-taraddud ke sabab

aa hī rahtā hai mire dil ko malāl ek na ek

maiñ to har-chand bachātā huuñ va-lekin haihāt

khub hī jaatā hai in āñkhoñ meñ jamāl ek na ek

tujhe kuchh husn-parastī se nahīñ kaam vale

ho hī rahtā hai mire jī kā zavāl ek na ek

kyā karūñ garche bhulātā huuñ bahut maiñ lekin

aa hī rahtā hai tirā mujh ko ḳhayāl ek na ek

majlis-e-vajd meñ paḌh apnī ġhazal tū 'inshā'

kar hī baiThegā abhī sunte hī haal ek na ek