vo rañg-o-bū hai ki āñkhoñ ko sūjhtā bhī nahīñ
vo phuul dil meñ makīñ hai ki jo khilā bhī nahīñ
ye terī yaad ki dil se panāh māñgtī hai
ye dil ki jis se nikalne kā rāsta bhī nahīñ
jo mujh ko DhūñD rahā thā mire makān se duur
vo mere dil meñ makīñ ho ke boltā bhī nahīñ
kabhī kabhī to havas sub.h-dam uchhāltī hai
vo ashk jin meñ koī gauhar-e-vafā bhī nahīñ
ham apnī khoj meñ aisī jagah nikal aa.e
vo mil gayā ki jo kahiye ki thā to thā bhī nahīñ
har aañkh barf huī jā rahī hai hasrat se
qarīb-o-dūr koī sho.ala-e-hinā bhī nahīñ
vo jis ke ruḳh pe zabāñ haiñ baḌī baḌī āñkheñ
koī qarīb se guzre to dekhtā bhī nahīñ
mirī hī god meñ hai aur mujhī se pūchhtā hai
vo naam kyā hai ki jo tujh ko bhūltā bhī nahīñ
maiñ terā dard samajh lūñgā kyūñki tujh sā huuñ
na hañs sake to mirī tarah muskurā bhī nahīñ
shab-e-firāq sahī us kī aañkh to lag jaa.e
vo aah kījiye kaise ki jo ravā bhī nahīñ