kidhar jā.ūñ kahīñ rastā nahīñ hai

kahāñ Dūbūñ ki dil dariyā nahīñ hai

idhar bādal kabhī barsā nahīñ hai

jahāñ tak shāḳh hai patta nahīñ hai

use chhat par khaḌe dekhā thā maiñ ne

ki jis ke ghar kā darvāza nahīñ hai

vahī hai ghoñsla chimnī ke pīchhe

magar chiḌiyoñ kā vo joḌā nahīñ hai

badan ke loch tak āzād hai vo

use tahzīb ne bāñdhā nahīñ hai

tire hoñToñ ko chhū dekhūñ to kahiyo

mire hoñToñ meñ kyā aisā nahīñ hai

badan Dhāñpe hue phirtā huuñ yaanī

havas ke naam par dhāgā nahīñ hai

sabhī insāñ farishte ho ga.e haiñ

kisī dīvār meñ saaya nahīñ hai

maiñ is darja muazzaz ho gayā huuñ

vo mere sāmne hañstā nahīñ hai