jab din chaḌhā badan pe badan sī sajī qamīs
utrī jo raat ghar meñ badan raat kī qamīs
do-chār saal pahle jise DhūñDte the vo
jī chāhtā hai phir se pahniye vahī qamīs
us kā durusht lahja use is tarah phabā
silky badan pe jaise saje khurdurī qamīs
chehre pe phailtā hai vahī jogiyā badan
āñkhoñ meñ kauñdtī hai vahī beḳhnī qamīs
āḳhir kahāñ kahāñ se rafū kījiye ise
ab to jahāñ-tahāñ se nikalne lagī qamīs
badlī jo jagmagāte hue chāñd par paḌī
yaad aa ga.ī kisī kī badan se bharī qamīs
jī chāhtā hai aaj alganī ye dekhiye
saarī vahī saped vahī kāsnī qamīs
kis se gilā kareñ ki ga.ī jhol rah ga.e
jaisī bhī mil ga.ī hai pahniye yahī qamīs