dukh zarā kyā milā mohabbat meñ

bas jhalakne lagā ibārat meñ

kaise kaise savāl kartā hai

ek pāgal tirī hirāsat meñ

kyuuñ nahīñ ho rahā asar is par

kyā bulūġhat nahīñ balāġhat meñ

lams terā davā thā jiine kī

maiñ to maarā gayā sharāfat meñ

aisī aadat huī asīrī kī

chain paḌtā nahīñ farāġhat meñ

ye jo hizyān bak rahe ho tum

ishq kī ho miyāñ harārat meñ

maiñ dhueñ se lipaT gayā baḌh kar

jo uThā thā tirī shabāhat meñ