ma.arka ḳhatm huā jañg abhī jaarī hai
dil kī māneñ ki ḳhirad kī yahī dushvārī hai
koī pattā nahīñ hiltā hai na khultī hai zabāñ
aah phir se kisī tūfān kī tayyārī hai
kyuuñ na ye dekh ke bīnā.ī daġhā de jaa.e
shams par bhī abhī zulmat kā fusūñ taarī hai
ab ye hasrat bhī liye jaate haiñ dil kī dil meñ
ye to kah lete tirā tiir bahut kaarī hai
haa.e kam-zarfī-e-dil tū ne kahīñ kā na rakhā
aah ne kah diyā ta.azīr bahut bhārī hai
tere mashkūr haiñ hamdam kiyā vāzeh tū ne
fe.al-e-ġhārat-garī sayyād kī nā-chārī hai
vaqt-e-furqat ye karam 'soz' pe barpā kar de
hañs ke kah de ki ye in.ām-e-vafādārī hai