safar kā ḳhvāb thā āb-e-ravāñ pe rakkhā thā

koī sitāra khule bādbāñ pe rakkhā thā

bhulā gayā hai mujhe guftugū ke saare maze

bas ek lafz thā pal bhar zabāñ pe rakkhā thā

vo ek ḳhaak sā manzar bas ab bahut hai mujhe

uThā ke jo kabhī qirtās-e-jāñ pe rakkhā thā

maiñ kyā gayā ki huā ḳhushk chashma-e-mahtāb

abhī to pahlā qadam āsmāñ pe rakkhā thā

usī ko 'shāhīñ' muqarrar kiyā hai jā-e-visāl

kanāra-e-shab-e-hijrāñ jahāñ pe rakkhā thā