kahāñ shikva zamāne kā pas-e-dīvār karte haiñ
hameñ karnā hai jo bhī ham sar-e-bāzār karte haiñ
zamāne se ravādārī kā rishta ab bhī baaqī hai
magar saudā kisī se dil kā ham ik baar karte haiñ
mahāz-e-jañg par sīna-sipar ho kar maiñ chaltā huuñ
magar buzdil hamesha pusht par hī vaar karte haiñ
nahīñ miltī unheñ manzil jinheñ ḳhauf-e-havādis hai
jo maujoñ se nahīñ Darte nadī ko paar karte haiñ
'majīd' achchhā nahīñ hotā kisī se bhī judā honā
magar ye rasm-e-duniyā ham adā sau baar karte haiñ