jab azm ke sho.aloñ ko himmat ne havā dī hai
tūfāñ ne hī sāhil kī tasvīr dikhā dī hai
sho.aloñ se gila kaisā bijlī se shikāyat kyā
gulshan ke nigahbāñ ne har shāḳh jalā dī hai
chāhā thā kareñ un se kuchh shikva-e-be-mehrī
lab hilne se pahle hī saugand khilā dī hai
ik vo bhī haiñ marte haiñ jo nañg-e-vafā ban kar
har vaar pe ham ne to qātil ko duā dī hai
kaañp uTThā hai jaane kyuuñ har tār-e-nafas 'sumbul'
jab mere buzurgoñ ne jiine kī duā dī hai