ajiib ḳhauf hai jazboñ kī be-libāsī kā
javāz pesh karūñ kyā maiñ is udāsī kā
ye dukh zarūrī hai rishte ḳhalā-pazīr hue
adā huā hai magar qarz ḳhud-shanāsī kā
na ḳhvāb aur na ḳhauf-e-shikast-e-ḳhvāb rahā
sabab yahī hai nigāhoñ kī be-harāsī kā
koī hai apne sivā bhī masāfat-e-shab meñ
sahar jo ho to khule raaz ḳhush-qayāsī kā
vo sail-e-ashk simaTne lagā hai sheroñ meñ
jise milā na koī rāsta nikāsī kā