kāñTe ko phuul sañg ko gauhar kahā gayā

is shahr meñ gadā ko sikandar kahā gayā

be-chehra log husn kā me.aar ban ga.e

parchhā.iyoñ ko nuur kā paikar kahā gayā

jallād ko masīhā-nafas kī sanad milī

insān-dushmanoñ ko payambar kahā gayā

kuchh jis ke paas nīsh-o-namak ke sivā na thā

chāk-e-jigar kā us ko rafū-gar kahā gayā

kyā shai hai maslahat bhī shab-e-tīra-fām ko

dānishvaroñ meñ sub.h-e-munavvar kahā gayā

gūñgā hai kar rahā hai ishāroñ meñ bāt-chīt

'sābir' ko kis binā pe suḳhnavar kahā gayā