zamīñ ko sajda kiyā ḳhuuñ se bā-vazū ho kar

maiñ razm-gāh se lauTā huuñ suraḳh-rū ho kar

jahāñ meñ phail ga.ī dūd-e-sho.ala se zulmat

falak pe bah gayā sūraj lahū lahū ho kar

mujhe thā dām-e-asīrī nasheb dariyā kā

uchhal gayā maiñ kināroñ se tund-ḳhū ho kar

gurez-pā.ī ko hai gumrahī kā dasht-e-balā

ḳhat-e-safar to chamaktā hai āb-jū ho kar

vo lams zā.iqa jis ne mirī zabāñ ko diyā

bikhar na jaa.e kahīñ saut-e-guftugū ho kar

kiyā hai pursish-e-ahvāl-e-zaḳhm ne rusvā

ye chaak aur numāyāñ huā rafū ho kar

rahī na TuuT ke girne se merī yaktā.ī

maiñ paash paash huā ḳhud se dū-ba-dū ho kar

zabān-e-ḳhalq pe shāhid maiñ harf-e-talḳh rahā

uḌī na ḳhaak mirī gard-e-ābrū ho kar