mujh ko to kuchh aur dikhā hai āñkhoñ ke us paar
tum batlāo āḳhir kyā hai āñkhoñ ke us paar
sapnā koī bikhar chukā hai āñkhoñ ke us paar
dariyā jaise TuuT paḌā hai āñkhoñ ke us paar
likkhūñ terā naam paḌhūñ to sāñval terā naam
terā hī bas naam likhā hai āñkhoñ ke us paar
bīnā.ī tere rastoñ ko thaam ke baiThī hai
tere ghar kā dar bhī vā hai āñkhoñ ke us paar
āñkhoñ ke is paar to jaise dariyā Thahar gayā
lekin sahrā bikhar gayā hai āñkhoñ ke us paar
din ta.abīr mirī chaukhaT par lā kar rakh degā
raat ne terā ḳhvāb bunā hai āñkhoñ ke us paar
rakh detā hai haath āñkhoñ par ġhair ko jab bhī dekhūñ
jaane aisā kaun chhupā hai āñkhoñ ke us paar
us ko jaatā dekh rahī haiñ hañs hañs kar ye āñkheñ
jaane kyā kuchh biit rahā hai āñkhoñ ke us paar
ab tū aa kar dekhegā to rotā jā.egā
ham ne aisā bain kiyā hai āñkhoñ ke us paar
bas ik ḳhvāb kī mayyat hai aur mātam-dārī hai
ham ne jā kar dekh liyā hai āñkhoñ ke us paar
ham ne terī āñkhoñ meñ rah kar mahsūs kiyā
kitnā dard chhupā rakkhā hai āñkhoñ ke us paar
ab duniyā ke chehroñ meñ tujh ko maiñ kyā dekhūñ
dil ne tujh ko dekh liyā hai āñkhoñ ke us paar
laakh zamāna bech aa.e tū laakh ho mujh se duur
lekin bilkul paas khaḌā hai āñkhoñ ke us paar
kyoñ na har ik jānib ab shahzāde kī sūrat ho
ham ne us ko naqsh kiyā hai āñkhoñ ke us paar
tujh ko to ābād lagā kartī haiñ ye āñkheñ
vīrānī kā shahr basā hai āñkhoñ ke us paar
ojhal ojhal rahne vaalā merī āñkhoñ se
mujh se kitnī baar milā hai āñkhoñ ke us paar
āñkhoñ se to nikal paḌā hai pal bhar meñ lekin
aañsū kā sāmān bachā hai āñkhoñ ke us paar
hairānī us paar se āḳhir kar baiThī hai kuuch
vo kitnā hairān khaḌā hai āñkhoñ ke us paar
tujh ko bhī sarshār na kar deñ āñkheñ to kahnā
ek tilism-e-hosh-rubā hai āñkhoñ ke us paar
patthar ho kar rah jā.eñgī āñkheñ muuñd 'rabāb'
ab bhī us kā ḳhvāb paḌā hai āñkhoñ ke us paar