ye qāfile yādoñ ke kahīñ kho ga.e hote
ik pal bhī agar bhuul se ham so ga.e hote
ai shahr tirā nām-o-nishāñ bhī nahīñ hotā
jo hādse hone the agar ho ga.e hote
har baar palaTte hue ghar ko yahī sochā
ai kaash kisī lambe safar ko ga.e hote
ham ḳhush haiñ hameñ dhuup virāsat meñ milī hai
ajdād kahīñ peḌ bhī kuchh bo ga.e hote
kis muñh se kaheñ tujh se samundar ke haiñ haqdār
sairāb sarāboñ se bhī ham ho ga.e hote