havā kā zor hī kaafī bahāna hotā hai
agar charāġh kisī ko jalānā hotā hai
zabānī da.ave bahut log karte rahte haiñ
junūñ ke kaam ko kar ke dikhānā hotā hai
hamāre shahr meñ ye kaun ajnabī aayā
ki roz ḳhvāb safar pe ravāna hotā hai
ki tū bhī yaad nahīñ aatā ye to honā thā
ga.e dinoñ ko sabhī ko bhulānā hotā hai
isī umiid pe ham aaj tak bhaTakte haiñ
har ek shaḳhs kā koī Thikāna hotā hai
hameñ ik aur bharī bazm yaad aatī hai
kisī kī bazm meñ jab muskurānā hotā hai