tujh se bichhḌe haiñ to ab kis se milātī hai hameñ

zindagī dekhiye kyā rañg dikhātī hai hameñ

markaz-e-dīda-o-dil terā tasavvur thā kabhī

aaj is baat pe kitnī hañsī aatī hai hameñ

phir kahīñ ḳhvāb o haqīqat kā tasādum hogā

phir koī manzil-e-be-nām bulātī hai hameñ

dil meñ vo dard na āñkhoñ meñ vo tuġhyānī hai

jaane kis samt ye duniyā liye jaatī hai hameñ

gardish-e-vaqt kā kitnā baḌā ehsāñ hai ki aaj

ye zamīñ chāñd se behtar nazar aatī hai hameñ