jo chāhtī duniyā hai vo mujh se nahīñ hogā

samjhautā koī ḳhvāb ke badle nahīñ hogā

ab raat kī dīvār ko Dhānā hai zarūrī

ye kaam magar mujh se akele nahīñ hogā

ḳhush-fahmī abhī tak thī yahī kār-e-junūñ meñ

jo maiñ nahīñ kar paayā kisī se nahīñ hogā

tadbīr na.ī soch koī ai dil-e-sāda

mā.il-ba-karam tujh pe vo aise nahīñ hogā

be-nām se ik ḳhauf se dil kyuuñ hai pareshāñ

jab tai hai ki kuchh vaqt se pahle nahīñ hogā