yaqīn-e-mohkam kā hai sahārā yahī amal kārgar hai pyāre

ilāj-e-darj-e-nihāñ yahī hai isī davā meñ asar hai pyāre

tirī nigāhoñ meñ haiñ samā.e jamāl-e-hastī jalāl-e-ma.anī

na dekh tū aur kī nazar se tirī nazar mo'atabar hai pyāre

nahīñ tirī raah rāh-e-mushkil hai rahbar-e-rāh ḳhud tirā dil

tire qadam meñ hai terī manzil tavīl be-shak safar hai pyāre

na hai hasīnoñ meñ kaj-adā.ī na zindagī meñ koī burā.ī

hai nekiyoñ hī kā ghar ḳhudā.ī agar tū ḳhud ḳhud-nigar hai pyāre

tire hī dil meñ hai jalva-farmā butoñ kī sūrat ḳhudā kā jaadū

yahī hai dair aur yahī hai ka.aba yahī mohabbat kā ghar hai pyāre

kahāñ chhupegā vo māh-paikar tū ho na māyūs-e-dīd dam-bhar

hoñ laakh parde ruḳh-e-hasīñ par tirī nazar bhī nazar hai pyāre

haiñ tere ash.ār 'arsh' aise rumūz hoñ zindagī ke jaise

tujhe na deñ log daad kaise baḌā hī tū nukta-var hai pyāre