nasīb-e-chashm meñ likkhā hai gar paanī nahīñ honā

to kyā ye tai hai ab rañj-e-pashemānī nahīñ honā

sakūñ se jā lagegī dil kī kashtī apne sāhil se

ki is barsāt meñ dariyā ko tūfānī nahīñ honā

sabhī kuchh tai-shuda ma.amūlī jaisā hone vaalā hai

kisī bhī vāqiye ko vaj.h-e-hairānī nahīñ honā

junūñ meñ mumkina had tak rahegā hosh bhī shāmil

mirī jaañ be-zarūrat kār-e-nādānī nahīñ honā

hamīñ un ḳhush-nasīboñ meñ se haiñ, jin ke nasīboñ meñ

ḳhudā ne saaf likkhā hai ''pareshānī nahīñ honā''