ek paudā jo ugā hai use paanī denā

apne āñgan ko na.ī rut kī kahānī denā

tirī āvāz se jab TuuTe mire ghar kā sukūt

dar-o-dīvār ko bhī sehr-bayānī denā

poñchh lenā mirī palkoñ se lahū kī būñdeñ

mirī āñkhoñ ko agar manzar-e-sānī denā

kashtiyāñ denā magar izn-e-safar se pahle

Thahre paanī ko bhī dariyā kī ravānī denā

yuuñ jalūñ maiñ ki na sharminda rahūñ sūraj se

aur kuchh aur mujhe soḳhta-jānī denā

ret par naqsh-e-kaf-e-pā nahīñ rahne paate

ahl-e-sahrā ko koī aur nishānī denā