dil meñ yuuñ pyaar kī ik taaza kahānī mahke
jaise āñgan men kahīñ rāt-kī-rānī mahke
maiñ ne lafzoñ ko kahāñ us kī taraf moḌā hai
zikr aa jaa.e jo us kā to kahānī mahke
sar se pā tak use ḳhushbū kā ḳhazāna kahiye
baiThe dariyā meñ utar jaa.e to paanī mahke
ġham kī sadiyoñ kī amānat hai ġhazal kī tahzīb
'mīr' ke ba.ad usī rañg meñ 'fānī' mahke
is ko kahte haiñ mohabbat kā karishma 'mansūr'
merī ġhazloñ meñ mirā dushman-e-jānī mahke