terī yādeñ bhī nahīñ ġham bhī nahīñ tū bhī nahīñ
kitnī vīrān hai ye aañkh ki aañsū bhī nahīñ
mere dil ko mire ehsās ko chhū jaatī thī
bhīge bhīge tire bāloñ kī vo ḳhushbū bhī nahīñ
haa.e vo pahle-pahal terī judā.ī kī ghaḌī
ab to piine kī koī chaah koī ḳhū bhī nahīñ
jo ġham-e-dahr kī rāhoñ ko hasīñ-tar kar de
bahke bahke tire qadmoñ kā vo jaadū bhī nahīñ
ab gunahgār nazar kī hai kahāñ jā-e-panāh
raah meñ duur talak koī parī-rū bhī nahīñ