mausamoñ vaale na.e daana o paanī vaale
ham vahī log vahī naql-e-makānī vaale
haañ bachā leñge yahī shahr ko jal jaane se
kuchh to baaqī haiñ abhī shahr meñ paanī vaale
rañg kyā ḳhuub jamegā jo kabhī mil baiTheñ
aur kuchh log tabī.at kī ravānī vaale
is liye aur bhulā detā huuñ va.ade akasr
mujh ko milte hī nahīñ yād-dahānī vaale
koī saame jo mile mujh ko ḳhabar kar denā
haiñ mire shahr meñ sab log kahānī vaale