badan pe ḳharqa-e-tahzīb phaTne vaalā hai
jise bachā ke rakhā hai bahut sambhālā hai
tumheñ dikhā.ūñ maiñ shahr-e-jadīd kā naqsha
ye DeḌh iiñT kī masjid hai ye shivāla hai
tamām raikoñ meñ rakkhī huī kitāboñ meñ
tumheñ ḳhabar nahīñ fikr-o-nazar kā jaalā hai
muhīb añdhere meñ raushan ḳhayāl logoñ par
na jaane agle hī pal kyā guzarne vaalā hai
jahāñ bhī ubhrī sadā-e-zamīr-e-insānī
jadīdiyat ke naqīboñ ne maar Daalā hai
fazā meñ uḌte hue aur laḌkhaḌāte hue
parind-e-ḳhasta kā ik āḳhirī sambhālā hai