aahaT bhī agar kī to tah-e-zāt nahīñ kī
lafzoñ ne ka.ī din se koī baat nahīñ kī
iz.hār na āñkheñ na tahakkum na qarīna
lahje ne bhī arse se mulāqāt nahīñ kī
isrār thā māthe pe na āñkhoñ meñ namī thī
tum ne to ri.āyat bhī mire saath nahīñ kī
tartīb diyā us ke liye shor-e-anā ko
ham ne bhī ka.ī din se bahut raat nahīñ kī
do chaar havāoñ ke qadam dhuup ke chhīñTe
'jāved' ne sheroñ meñ na.ī baat nahīñ kī