bayāñ ai ham-nashīñ ġham kī hikāyat aur ho jaatī

zarā ham ḳhastā-hāloñ kī tabī.at aur ho jaatī

nasīhat hazrat-e-vā.iz kī sunte bhī to kyā hotā

yahī hotā ki ham ko un se vahshat aur ho jaatī

bahut achchhā huā aañsū na nikle merī āñkhoñ se

bapā mahfil meñ ik taaza qayāmat aur ho jaatī

taḌap kar dil ne manzil par mujhe chauñkā diyā varna

ḳhudā jaane ki tai kitnī masāfat aur ho jaatī

tumhāre naam se hai bekasoñ kā naam vābasta

bulā lete agar dar par to nisbat aur ho jaatī

bahut saste rahe nīchī nazar se dil liyā tum ne

agar nazreñ bhī mil jātīñ to qīmat aur ho jaatī

sharaf baḳhshā hai tum ne aaj mujh ko ham-kalāmī kā

kahūñ kuchh dil kī baat itnī ijāzat aur ho jaatī

zahe qismat navāzā hai javāb-e-ḳhat se 'vāsif' ko

dikhāte ik jhalak itnī ināyat aur ho jaatī