tumhāre hoñToñ pe bas merā naam zinda rahe

tumhāre saath bitā.ī ye shaam zinda rahe

ḳhudā kare ki ye niyyat hī kaam aa jaa.e

havāla ho yā na ho merā kaam zinda rahe

mujhe davām kī chāhat nahīñ magar ai ḳhudā

maiñ chāhtī huuñ ki merā kalām zinda rahe

ajiib Dhañg kī ye chaal chal gayā hai koī

ki bādshāh na ho aur ġhulām zinda rahe

mirī ġhazal ke sab ash.ār chāhe rad ho jaa.eñ

magar imaam pe merā salām zinda rahe

zamāne bhar kā mujhe hosh tak na ho 'bushrā'

tumhārī yaad kā bas ek jaam zinda rahe